Home Page
Contatti
 
Cerca in Brindisiweb

 

Versi Dialettali - POESIE

LU CAVADDU PARATU
di Lucia Tramonte

Brindisinu ca sta uardi
lu cavaddu a n’prucissioni,
mi sa tiri ti ddo’ veni
quest’antica tradizioni?

Ci ti ssietti picca picca
ti la contu cu la rima,
cussì viti quant’è ricca
la leggenda brindisina.

Mo ti portu manu manu
a ddi tiempi ormai passati
ca contr’a li mussurmani
‘nci mandaumu li Cruciati.

Conti, vescuvi e rignanti,
ci pi sordi, ci pi feti,
si partiunu luenghi luenghi
ci an’ cavaddu, ci all’ ampeti.

Conquistari lu Sepolcru,
era questa la mintìa.
Liberà Gerusalemmi,
sulu quistu si vulìa.

Cussì puru re Luviggi,
ti la feti difensori,
cu la croci e cu la spata,
si partìu contr’alli Mori,

Propria mmienzu a na battaglia
ntra stritori, sangu e morti,
re Luviggi fo ‘tterratu
e ‘nsirratu ntra nu forti.

Ma cchiù assai pi la calera
quiddu re si llicrinìa
pi quedd’Ostia Consacrata,
ntra cè mani scè finìa!?

Lu feroci Salatinu,
livantinu e scangiargientu,
ddurau subbutu l’affari:
nu riscattu a pacamentu

-Ci vuè andretu l’Ostia Santa
nu miglioni a rimitiari.
Puè turnari a casa tua,
scuti t’oru m’ha purtari!

Mo’, lu povuru Luviggi,
ca era re, ma no a denari:
-‘Ddo’ li trovo tanta sordi,
ti ‘ddo’ l’aggia scè pigghiari?

Lu Signori però è grandi
e no ‘nserra mai li porti:
quando a Brindisi sbarcau,
‘nci truvau na bona sorti.

Comu messi peti a nterra,
nienti menu scè ccuntrau
Federicu imperatori
ca soccorsu li purtau.

Sullivatu ti lu viaggiu,
rrifinatu ti l’arsura:
- Federì, m’ha da’ na manu,
m’ha f’assì ti sta svintura!

Federicu, sprisciulatu,
alla borsa mesi manu:
- No sia mai stu sacrileggiu:
l’Ostia a manu allu Surtanu!

Alla Zecca brindisina
ntra nu niente feci fari
trentamila scuti t’oru,
trentamila piezzi rari

Alla tretta stava l’Ostia
a nu calici ppuggiata,
all’ambersa l’aquila sveva
cu la capu mpirnacchiata.

Quando veddi li turnisi
Salatinu rrumaniu,
all’onori e alla feti
ti Luviggi s’inchinau.

-Pi la feti adamantina,
pi lu pattu c’ha onoratu,
stu tesoru mancu toccu:
torna a casa scuscitatu!

Toci, toci, mmienzu a mari
si ndi scia lu bastimentu,
re Luviggi ringraziava
lu Divinu Sacramentu;

già luntanu vitìa terra,
sintìa l’affutu ti casa;
doppu tanta patimenti
finarmenti va’ riposa.

Ma nu vientu ti maestrali,
quedda varca benedetta,
cu gran forza scè ‘nsabbiau
ntra na secca malitetta.

Fora tristi di mumenti!
A ci cchiù si manisciava!
Pi sarvà cristiani e cosi
nsarti e veli nturtigghiava.

Mienzu a totta da muina,
mienzu a tuttu du rrivuetu
quarchetunu sce chiamau
l’Arcivescuvu e lu seguitu;

alli mani consacrati
ti lu vecchiu monsignori
pi puteri cunsignari
sanu e sarvu lu Signori.

Si furmau na zacalonga,
nu spunderiu ti cristiani,
mentre all’aria si spandìa
nu rintoccu ti campani.

Nanti nanti Monsignori
cu li santi paramenti
stava n’sella a nu cavaddu
cu preziosi uarnamienti.

Pi purtari lu Signori
dignamenti scia paratu,
ti broccatu e ti villutu
cu oru finu ricamatu

All’ampeti, penitenti,
re Luviggi e Federicu
cu li retini alli mani
camminaunu fiancu a fiancu.


Sanu sanu lu Capitulu
cu dalmatiche e pianeti
ntra lu fumu ti l’aggienzu
sicutava peti peti

E po’ prieviti e arciprieviti
suori, muenici e picuezzi,
ti signuri e signuruni
staunu ddà li megghiu piezzi

Tuttu tretu e pi’ la strata
tantu populu pizzenti:
ci scazatu, ci strazzatu,
ci ddisciunu e ci murenti.

Disperati ti la vita,
l’uecchi fissi all’Ostia Santa
pi’ circari a Gesù Cristu
nu signali ti speranza!

(2008)


» Documento correlato: La spiaggia di Sant'Apollinare

Print Friendly and PDF

English version

Brindisi på dansk

Come arrivare e muoversi
 



Partnership

 

Brindisiweb è un'idea di Giovanni Membola Crediti Copyright Contatti