La sumenta ti Maria la Castagnara
di Mario Galasso

Abbiamo ricevuto e volentieri pubblichiamo i seguenti versi in dialetto brindisino scritti da Mario Galasso, dedicati a Maria la Castagnara, una istituzione per i ragazzini delle scuole elementari di Corso Roma nella Brindisi di 60 anni fa:

Mi ricuerdu, eru piccinnu, scia alle scole elementari
però prima ti trasìri una cosa vulìa a fari:

cu li suerdi ‘ntra la manu (ca cuntati li tinìa)
m’infilavu ntra ‘na porta e na nunna mi dicìa:

Tu cce vuei? Nu quadernettu? O ti servi ‘na matita?
Niquirizia, la sumenta, o ‘na mendula candita?

Ma cce tieni ‘ntra li rrecchi? Na bombetta o nu penninu?
Ghiacciomenta? O na pastiglia? non ci sienti o sì cretinu?

T’a spicciatu sini o noni? Mi vuè dici ce ti servi?
Mi uardava din’all’uecchi, lli vinivanu li nniervi.

Tretu a mei ‘nc’era na fila ti vagnuni ca spingìa,
ca vuliunu trasiri, e nisciunu si ndi scìa.

Iu, pigghiatu lu curaggiu, alla fine ddumandavu:
“Na bustina ti sumenta”, e poi subbutu paiavu

e di corsa mi nd’assìa, la bustina ‘ntra la manu
la cartella cu quidd’atra poi, nu picca cchiù luntanu

mi ssittavu a quarche vanda, e strazzavu la bustina,
mi mangiavu la sumenta ca sapìa ti naftalina,

toi o tre semi tutt’anziemi, cu lu sali accompagnati,
na sputazza pi lu restu, tre minuti e già spicciati.

Ci na fiata mi restava quarche seme ‘ntra la manu
mi ‘ndi scia dentr’alla scola masticando chianu chianu;

‘ntra la classe li spicciavu ‘nnascundutu ‘ntra lli banchi,
tott’an terra era nu lacu ti scaracchi gialli e bianchi.

E la mestra ca girava ‘ntra li banchi pi controllu
ci vitìa ‘dda purcaria mi pigghiava pi lu collu,

mi cacciava ti la porta, e vinìa lu direttori,
si ‘ncazzava e ‘ndi dicìa ma ti tutti i culori.

Quandu poi turnavu a casa, menchia papa ncè ‘nfurrata
ti la mamma nu scaffoni, ‘na cinghiata ti lu tata.

Moi, ca l’anni sò passati, sacciu comu si chiamava
quedda nunna addoi na vota la sumenta si ccattava;

e Maria la Castagnara ca paura mi facìa
m’è rumasta ‘ntra lu cori com’alla sumenta mia.