Le Poesie recenti in vernacolo brindisino

L’amici ti vagnoni

di Domenico Faraselli

Ntra lu palazzu addò abbitava iu,
nu picca citti nò sapìumu stari;
a mienzu allu piazzali, nui vagnuni,
continuamenti stàumu a critàri.

Toninu, Tulliu, Sergiu, Marcu, Minu,
iu e Rafèli, Enniu, Ccillu, Gianni,
alli battagli a petri ndi sfitàumu
e cchiù ti quarche vòta èrunu tanni.

Però sciùcàumu puru a scundicova,
a llibera fratelli e a pidinu,
cu li ramicchi chini, cu li biddi
e tanta voti a sartacavallinu.

La sera a casa stanchi, llicrinùti,
ndi rritiràumu, tutti assai cuntienti
ma già pinzandu alla sciurnata dopu,
ca nò passava senza fari nienti.

Li giùvini ti mòi sò assai diversi,
nò sannu cchiù sciucàri a cumpagnia,
nò sapunu ce t’eti l’amicizia
ca nui vivìumu a mpaci… cu letizia!