Canzoni in vernacolo brindisino

Lu Cuncirtinu

di Giovanni Guarino – musica di A. Briganti

Na varca cu li fraschi maggiu parata,
chiena di lampioncini e di bandieri,
stasera totta bedda lluminata
an giru a lu puertu l’ha viteri

iu vogghiu cu ti vesciu
iu vogghiu cu ti sentu
stasera pi lu priesciu
nu vasu t’haggia dà.

nziemi all’amici mia cu mandullini
cu li chitarri e cu li tamburrieddi,
hamma furmari tanta cuncirtini
a cumpagnia di beddi carusieddi

iu vogghiu cu ti vesciu
iu vogghiu cu ti sentu
stasera pi lu priesciu
nu vasu t’haggia dà.

Gnetunu hava purtari nu muloni,
ca doppu tutt’anziemi hamma mangiari,
nù puru hamma cantari li canzoni
mmienzu alla festa a Sant’Apullinari

iu vogghiu cu ti vesciu
iu vogghiu cu ti sentu
stasera pi lu priesciu
nu vasu t’haggia dà.

iu portu na taiedda di purpetti,
fatti di carni bona di vaccina,
quattru piattuni crandi di spaghetti
stasera mama stessa li cucina

Penza cu mangia e mbivi
e no ti’ndi’ ncaricari
si fessa ci ti privi
di rrobba e di mangiari

nde priparata puru nà puddica
chena di chiapparini e pumbitori
l’è fatta cu lu granu ti la spica
n’de chena totta casa pi l’addori

Penza cu mangia e mbivi
e no ti’ndi’ ncaricari
si fessa ci ti privi
di rrobba e di mangiari

la vozza grandi chiena di lu vinu
sempri di costi a me s’hava travasari,
gne tantu, doppu qualche cuncirtinu
na ssimbuzzata a tutti fazzu fari

Penza cu mangia e mbivi
e no ti’ndi’ ncaricari
si fessa ci ti privi
di rrobba e di mangiari

quando d’himu ccunzati bueni bueni,
sobbra a la spiaggia tutti hamma ballari
nd’hama mbrazzari e ce ndi veni veni,
do vasi a pizzichilli nd’hamma dari.

Penza cu mangia e mbivi
e no ti’ndi’ ncaricari
si fessa ci ti privi
di rrobba e di mangiari