La granatina
di Mario Galasso

Abbiamo ricevuto e volentieri pubblichiamo i seguenti versi in dialetto brindisino scritti da Mario Galasso:

L’estati cu lu cautu e senza protezioni no ssi putìa tinìri ghiacciatu nu muloni,
Ci lu vulivi friscu e buenu pi mangiari dopu la menzatìa ti l’eri a scè pigghiari.
Mammeta ti dicìa viti cu ti ‘ndi vai, li suerdi t’aggiu datu, no ndi spindìri assai.
Ti faccia alla parrocchia vicinu a casa mia ‘nc’era na purticiedda apierta ‘ntra la via.
‘Nci stava nu cristianu ca tretu a nu banconi quando trasivi all’ombra ti tava lu muloni,
lu sarginiscu russu; an manu si sintìa ca era tuttu gelatu, lu friscu ti piacìa
ca fora era sulagna, lu cautu ti l’estati, mancu nu cani an giru, li chianchi ‘rruventati.

Ma prima ti paiari quiddu ca si paiava li dumandavi sempri quiddu ca iddu spittava:
“Quantu é na granatina o bianca o tricolori?” “Bianca veni 3 lire, e cincu a tre culori”.
Bianca, sulu lu ghiacciu, senza la bottiglietta ca ‘nci facìa catìri la goccia benedetta;
la menta e lu lamponi sobbr’alla granatina ti la facìunu bedda comm’a na bandierina.
A mienzu senza nienti, lu biancu era lu ghiacciu, lu verde ti na vandi, lu russu era n’assaggiu.

Tantati li cazuni pi controllari an pata ci li tinivi tutte pi farti sta granata
li cincu liri assìunu, e ddu cristianu azava lu saccu ca vagnatu sobbra allu ghiacciu stava.
Lu ghiacciu era na sbarra longa cchiu ti nu metru, quiddu ti la rascava ti ‘nnanzi e poi ti tretu.
Rascava cu li mani russi comu lu fuecu ca scìunu annanzi e arretu ma senza mai di sbiecu.

Quandu la grattachecca cchiù non ce la facìa, nu cuerpu ti la manu e la granatina assìa;
di sotta allu banconi assìa la bottiglietta, na goccia ‘ndi catìa, la mira era perfetta:
sobbr’a nu latu verdi, lu russu all’atra vanda, nienti ‘ntra li culuri; lu saccu pi mutanda,
lu ghiacciu riturnava a mienzu alli muluni a difriscari totta la stanza e li vagnuni
vinuti pi pigghiari muluni e granatina, 3 lire quedda bianca, e cincu la cchiù fina.
E lu ritornu a casa sott’allu solleoni ti lu facivi chianu ‘nducendu lu muloni;

Sucandu granatine estati dopu estati moi no lu faci cchiui, li cosi sò cangiati:
sì diventatu viecchiu, li tieni li turnisi, ma quiddu ca ti manca sò li muluni appisi
sott’alla balconata ti casa ti lu nanni, li pumbitori sicchi, li menduli e li panni
distesi ad asciucari ‘ppinduti ‘ntra la loggia, e la capasa chena ti fichi culla goccia.

Puru quiddu cristianu vicinu a casa mia nò rasca cchiù lu ghiacciu, finita è la fatìa,
è muertu avi tant’anni, ci sapi quandu è statu, però ce t’aggia diciri, e ci se l’è scurdatu?
Tre lire quedda bianca, cincu la tricolori, ma lu muloni quantu? Scurdatu lu valori,
no mi ricuerdu cchiui, solo la granatina, ti quandu m’aggiu azatu ti liettu stamatina:
Lu frescu ti la stanza, lu ghiacciu e lu muloni, la granatina fredda ti quando eru vagnoni.